Bavarezët mposhtën 3-0 Lionin në gjysmëfinalen e dytë, të luajtur të mërkurën. Liga e Kampioneve ka luajtur të mërkurën sonte aktin e dytë gjysmëfinaleve, duke përcaktuar edhe finalisten tjetër që do të përballet me Paris SG-në për trofeun më prestigjioz të klubeve të kontinentit. Dhe pas asaj fitoreje historike, 8-2, të korrur në gjysmëfinale përballë Barcelonës, ishte menduar se Bajerni i Mynihut do ta shpartallonte Lionin.
Por nuk ka ndodhur kështu, edhe pse gjigandja bavareze ka arritur të realizojë dy herë brenda 33 minutave të para. Ndonëse Lioni e ka nisur mirë takimin, ka qenë Serzh Gnabri ai që ka thyer qëndresën e francezëve me një goditje në kufijtë e zonës në minutën e 18-të. Gjermanët do të mbeten në sulm dhe do të gjejnë edhe një gol të dytë, 15 minuta më pas, me të njëjtin autor.
Përtej përpjekjeve të Bajernit, Lioni do të mbahet dhe pjesa e parë do të mbyllet kështu me epërsinë e dyfishtë të gjermanëve. Pjesa e dytë, ndonëse ka qenë e luftuar dhe me raste të shumta për shënim, ka sjellë një gol vetëm dy minuta para fundit të kohës së rregullt, me anë të të zakonshmit Levandovski. Mbyllet kështu me fitoren 3-0 të Bajernit të Mynihut kjo gjysmëfinale përballë Lionit dhe gjithçka tanimë është gati për duelin franko-gjerman për kurorën evropiane.
La.Mi/Fjala.al
