Detaje të reja kanë dalë lidhur me grabitjen e ndodhur në orët e para të mëngjesit të sotëm, ku një e moshuar u dhunua dhe u lidh, para se ti merreshin paratë.
Ngjarja e rëndë u shënua në Pukë, në fshatin Kishagji, ku viktima është 70-vjeçarja Mrikë Ndoja.
E moshuara duke folur për mediat ka treguar momentet e tmerrit, kur dy persona të maskuar i hynë në shtëpi. Ndoja tregon se grabitësit i kërkuan paratë dhe nisën ta godisnin me shkelma.
“Më hodhën përtokë. Më thanë ku ke paratë. Më rrahën, njërin krah e kam me dëmtime. Më morën me shkelma. Nuk e di sa ishte ora. Zoti më ka zgjidhur. Nuk e di, me dhimbje jam zgjidhur. Nuk i njoh autorët. Çfarë të them…. Të gjejnë autorët”, është shprehur e moshuara.
70-vjeçarja thotë se nuk ka burrë dhe fëmijë dhe se pas asaj që ka ndodhur ka frikë të jetojë në shtëpi. Grabitësit e të moshuarës, i morën Ndojës, rreth 1 milionë lekë të vjetra./Bl.Ba/Fjala.al
