Detaje të reja kanë dalë në dritë nga mbytja e 17-vjeçares Enisa Doda në Velipojë. Zhdukja e motorit të ujit me të cilin po bënin xhiro në det dhe dëshmia e 25-vjeçarit Indrit Bajraktarit kanë ngritur dyshimet se ngjarja në Velipojë nuk ka qenë aksidentale.
Motori i ujit nuk është gjetur, policia ka arritur të sekuestrojë vetëm çelësin. Ndërkohë, 25-vjeçari i pyetur nga pronarët e motorit të ujit se ku është vajza, ai ka dhënë një dëshmi të rremë duke thënë se “vajzën e ka marrë xhaxhai i saj”.
Mësohet se të rinjtë ishin njohur së bashku në rrjetet sociale dhe ishin thjeshtë shokë dhe dolën një xhiro në det.
Ndërsa burime për “Fjala.al” bëjnë me dije se ka dalë edhe autopsia e vajzës së vdekur, dhe është konstatuar se nuk ka shenja dhune në trup, por vetëm disa të nxira nga përplasja e saj në ujë pas rrëzimit nga motori i ujit.
Policia thotë se vijon punën për zbardhjen e plotë të ngjarjes. 25-vjeçari ndodhet në qeli i akuzuar për veprat penale “Shkaktimi i vetëvrasjes”, “Moskallëzimi i krimit” dhe “Veprime që pengojnë zbulimin e së vërtetës”.
Është e paqartë përse policia ka vënë si akuzë kryesore ndaj të riut, atë të shkaktimit të vetëvrasjes./Bl.Ba/Fjala.al
