Një vajzë myslimane 17-vjeçare me origjinë boshnjake ra në dashuri dhe u lidh me fqinjin e saj, një të krishterë serb. Për ta ndëshkuar për gabimin e madh, prindërit e saj, xhaxhai dhe vëllai i rruan kokën tullë.
Historia vjen nga Besacon në lindje të Francës, ku të akuzuarit për dhunën ndaj së miturës do të gjykohen nga një gjykatë në Strasburg.
“U rrah dhe u qeth tullë nga familja sepse u dashurua me një të krishterë. Jam thellësisht i tronditur nga torturat e pësuara nga kjo vajzë 17-vjeçare. Ky barbarizëm kërkon dënimin më të rëndë”, denoncoi ministri i Brendshëm Gerald Darmanin në Twitter.
Sakaq policia ka arrestuar familjarët e vajzës, të akuzuar për dhunë ndaj të miturve.
Adoleshentja kishte mbërritur në Francë nga Bosnje-Hercegovina dy vite më parë me familjen, ndërsa prej disa muajsh ishte lidhur me një 20-vjeçar serb, i cili jetonte në të njëjtin pallat me të.
Dy familjet njiheshin dhe raportet i kishin të mira, por kur të rinjtë nisën të flisnin për martesë, ndodhi ndëshkimi, pasi familja i tha vajzës “Jemi myslimanë, nuk mund të martohesh me një të krishterë”.
Vajza aktualisht është dërguar në një qendër për mbrojtjen e viktimave të dhunës./Bl.Ba/Fjala.al
