Ministrja e Drejtësisë, Etilda Gjonaj ka reaguar nëpërmjet një postimi në ‘Facebook’ duke i shprehur ngushëllimet familjarëve për ndarjen nga jeta të Thimio Kondit.
Thimio Kondi ishte ish ministër i drejtësisë, ish kryetar i Gjykatës së Lartë dhe jurist i njohur, ndarja nga jeta e të cilit shkaktoi një humbje të madhe për drejtësinë shqiptare.
“Trishtim dhe pikëllim për humbjen e parakohshme të juristit të shquar, ish-Ministrit të Drejtësisë dhe ish Kryetarit të Gjykatës së Lartë, Thimio Kondi. Sot përjetojmë humbjen e thellë për një personalitetet më të spikatura të drejtësisë, një jurist me një karrierë të gjatë dhe të shkëlqyer në jurisprudencën shqiptare.
Humbja e ish-Ministrit Kondi sjell një boshllëk të pallogaritshëm tek kolegët, miqtë dhe të njohurit, por mbi të gjitha tek familja e tij, të cilës i drejtoj respektin tim të thellë dhe ngushëllimet më të ndjera” shkruan ajo. Kondi ndërroi jetë ditën e djeshme. Ai iu nënshtrua një ndërhyrje kirurgjikale, pas të cilës nuk mundi të mbijetojë.
