Kryeministri Edi Rama ishte i pranishëm në aktivitetin për hapjen e dosjes së Sigurimit të Shtetit, në nder të shkrimtarit Martin Camaj. Në fjalën e tij, kryeministri shprehu vlerësimet më të larta për Camajn.
Rama sulmoi ata që e cilësuan shkrimtarin si ish-sigurims, duke thënë se ‘djajtë’ nuk e lanë të qetë as në botën tjetër. Sipas Ramës, ky aktivitet është një tjetër varrim, ai i shpifjeve ndaj Camajt.
Menjëherë pas kësaj deklarate ka reaguar Romeo Gurakuqi i cili është drejtuar kryeministrit Rama duke i thënë se ata djajtë që sulmuan Martin Camajn dhe Ernest Koliqin jane miqte, besniket dhe bashkëpunëtoret e tij.
Ndër të tjera ai e ka quajtur shfaqjen e sotme të Ramës si hipokrizi, ndërsa thekson se ata ‘djaj” janë pikërisht ata që Rama i mbështet dhe i financon për të rrëfyer dhe shkruar, njëlloj si dikur, anën e drejte dhe të errët të historisë.
Postimi i plotë i Romeo Gurakuqit
Djajtë që sulmuan Martin Camajn dhe Ernest Koliqin janë miqtë, besnikët dhe bashkëpunëtoret tuaj zoti Kryeministër Edi Rama. Janeë ortakët e aferave tuaja.
Ata që ju u keni besuar poste të rëndësishme në agjencitë qeveritare, të turizmit, pronave në bregdet, informacionit të klasifikuar, udhëheqjes së akademisë shtetërore dhe bordeve kinse kontrolluese të tyre.
Djajtë sulmues dhe ata që e lehtësuan sulmin e tyre ndaj dy kolosëve të Shkodrës për Kombin, janë pjesë e së njëjtës “familje” urrejtësish të Shqipërisë së ëndërruar nga Camaj, Koliqi, Fishta, Frashëri, Nosi, Harapi, etj..
Ata falen në të njëjtin rreth politik, “shkencor” dhe policor të djeshëm dhe të sotëm, që ju mbështet dhe shoqëron në shfaqjet tuaja propagandistike, siç ishte edhe kjo e sotmja. Janë ata që ju i mbështesni dhe i financoni për të rrëfyer dhe shkruar, njëlloj si dikur, anën e drejtë dhe të errët të historisë.
Shfaqja juaj e sotme është një hipokrizi e tejskajshme mbas 7 viteve që ju personalisht keni lejuar në mënyrë të qëllimshme, rindërtimin në publik të portreteve të atyre që e shtypën dhe vranë elitën e kombit dhe desidencën jo komuniste për 50 vite me radhë./Bl.Ba/Fjala.al
