Stërvitja e fundit e kuqezinjve në stadiumin “Dinamo” të Minskut duket se ka qartësuar disi idetë e trajnerit Reja sa i përket formacionit që do të hedhë në fushë këtë të premte, kundër Bjellorusisë, në debutimin e edicionit të ri të Nations League.
Stërvitja për kuqezinjtë shkoi relativisht e qetë, me trajnerin që provoi skemat e fundit përpara sfidës, ndërsa të vetmen dilemë duket se e ka në qendër të mesfushës, në rreshtimin e tij të zakonshëm 3-5-2, ku Strakosha si zakonisht do të qëndrojë mes dy shtyllave, ndërsa në mbrojtje në mungesë dhe të Ismajlit në rreshtimin me 3 do të jenë Gjimshiti, Dermaku dhe Veseli.
Në mesfushë, Hysaj do të mbulojë krahun e djathtë, siç dhe u paralajmërua në konferencën për shtyp përpara sfidës, Bare dhe Gjasula janë të konfirmuar dhe për paraqitjet që kanë bërë nga edicionet e shkuara, ndërsa balotazhi në mungesë të Memushajt është mes Laçit dhe Abrashit, me të parin që është më i favorizuar për momentin.
Në krahun tjetër të mesfushës do të luajë nga minuta e parë Roshi, që vjen pas disa paraqitjeve të mira me Terek Grozny, ndërsa në sulm do të jetë dyshja Sadiku-Cikalleshi, që do të përpiqen të kompensojnë njëri-tjetrin, duke qenë se kanë cilësi të ndryshme./Bl.Ba/Fjala.al
