Publikohet nga revista prestigjoze “The Lanset”, raporti i parë mbi vaksinën e koronavirusit nga shkencëtarët rusë.
Sipas tyre, testet e hershme treguan shenja të një përgjigjeje imune të organizmit.
Thuhet se çdo person të cilit iu administrua vaksina, u krijuan antitrupa për të luftuar virusin dhe nuk u paraqit asnjë efekt anësor serioz.
Rusia e licencoi vaksinën për përdorim lokal në gusht, duke u bërë kështu vendi i parë që bënte diçka të tillë, që përpara se të dhënat të bëheshin publike. Sipas ekspertëve, testet janë zhvilluar në shkallë shumë të vogël për të provuar në mënyrë të qartë efikasitetin dhe sigurinë e tyre.
Rezultatet e fundit u përshëndetën edhe nga Moska, duke i cilësuar ato si përgjigjen më të mirë ndaj kritikëve.
Mjekët perëndimorë janë shqetësuar në lidhje me shpejtësinë e punës së Rusisë, duke lënë të kuptohet se në vijim, mund të jenë kapërcyer hapa tejet të rëndësishëm.
Presidenti Vladimir Putin, deklaroi muajin e kaluar se vaksina i kishte kaluar të gjitha verifikimet që kërkoheshin duke përmendur edhe rastin e vajzës së tij ku tha se ia kishte dhënë edhe asaj. /Er.Ke/Fjala.al/
