Pasi ka fituar takimin e parë, të luajtur para 3 ditësh në Minsk përballë Bjellorusisë vendase, me rezultatin 2-0, Shqipëria e futbollit do të zbresë sot në fushën e blertë të “Arenës Kombëtare” për të luajtur takimin e dytë të grupit të 4-t të Ligës C të Ligës së Kombeve të Evropës.
Ndeshja nis në orën 20:45 dhe përballë kuqezinjve do të jetë përfaqësuesja e vendit baltik, Lituanisë, e cila e ka humbur, në mënyrë të papritur, 0-2, takimin e para 3 ditëve, të luajtur në fushën e vet para Kazakistanit. Pak minuta më parë, në faqen zyrtare të UEFA-s janë bërë publike edhe formacionet zyrtare.
Sikundër kishte paralajmëruar trajneri Edoardo Reja, konfirmohen dy ndryshime sa i përket rreshtimit kuqezi. Kështu, sikundër kishte paralajmëruar edhe trajneri italian, Enea Mihaj dhe Qazim Laçi janë 2 lojtarët që do të debutojnë si titullarë me fanellën kuqezi, teksa sulmi i është besuar Sadikut dhe Manajt.
Ja formacionet zyrtare:
SHQIPËRIA: Strakosha, Gjimshiti, Mihaj, Dermaku, Hysaj, Trashi, Abrashi, Gjasula, Laçi, Manaj, Sadiku. Trajner: E. Reja.
Lituania: Svedkauskas, Vaitkunas, Palionis, Girdvainis, Mikolunas, Simkus, Dapkus, Lasiskas, Vorobjovas, Kazlauskas, Shimkus. Trajner: V. Urbonas.
La.Mi/Fjala.al
