Taulant Xhaka do të vazhdojë të jetë pjesë e Bazelit dhe nuk do të largohet nga zviceranët, siç flitej prej kohësh.
Mediat helvete bënë të ditur se mesfushori i ka dhënë fund të gjitha dilemave ditën e sotme, teksa rinovoi kontratën me Bazelin deri në vitin 2024.
29-vjeçari ka vendosur që të qëndrojë tek Bazeli, aty ku është edhe shtëpia e tij, pasi kujtojmë që është produkt i akademisë së këtij klubi dhe nga viti 2010 është pjesë e ekipit të parë, përveç sezonit 2012-2013, kur luajti i huazuar te Grasshopers.
Flitej se mesfushori do të transferohej tek Beshiktashi, pasi ishte në bisedime me ekipin turk , por në fund nuk është finalizuar dhe Xhaka do të vazhdojë të jetë pjesë e Bazelit.
Ai ka luajtur mbi 350 ndeshje në Zvicër dhe ka shënuar 12 gola, ndërsa me Kombëtaren Shqiptare numëron 31 ndeshje duke shënuar rrjetën në fitoren 1-0 ndaj Izraelit në Ligën e Kombeve, në stadiumin “Elbasan Arena”.
Fj.Ak/Fjala.al
