Ambasada shqiptare në Athinë është përfshirë shpesh herë në skandale dhe kjo ka qenë ndër arsyet e ndërrimit të gjithë personelit në këtë ambasadë.
Në një video të mbërritur në redaksinë e “Fjala.al” vërehet një numër i lartë qytetarësh shqiptarë që presin të marrin shërbime në ambasadën shqiptare.
Pavarësisht situatës së krijuar nga koronavirusi, ambasada shqiptare në Athinë nuk ka marrë asnjë masë për të parandaluar krijimin e radhëve të gjata të qytetarëve që kërkojnë shërbime, ku vihet re se nuk respektohet as distanca fizike dhe as organizimi.
Me situatën aktuale na njeh Shpëtim Zinxhiria i cili teksa poston në rrjetin e tij social foto ku shfaqen grumbuj njerëzish e shoqëron edhe me një mbishkrim.
“Sot në ambasadë ora 12. Pa distancë sociale, pa organizim dhe pse e paguajmë atë të shkretë pasaportë 6-7 herë më shtrenjtë se vendet e Evropës.
Nëse ka ndokush ndonjë dyshim le ta përgënjeshtroj këtë korrupsion. Të falenderojmë kompaninë franceze për këtë gjendje, për çmimet tratosferë të pasaportave.
E falenderojmë që punonjësit e saj punojnë në të zezë. Punojnë pa sigurime shoqërore në një godinë përfaqësie. Turp për atë shtet indiferent”, shkruan Zinxhiria.
Qytetarët shpesh janë ankuar se nuk marrin shërbimet e kërkuara dhe se procedurat janë të stërzgjatura./Bl.Ba/Fjala.al
