Shtetet e Bashkuara të Amerikës shënuan mbi 200 mijë të vdekur nga koronavirusi duke u renditur që nga fillimi i pandemisë si vendi më me shumë të infektuar dhe të vdekur nga Covid-19.
Në nder të 200 mijë viktimave u vendosën 20 mijë flamuj amerikanë përreth monumentit të Uashingtonit. Cdo flamur ishte vendosur për nder të 10 viktimave.
Parashikimet e ekspertëve dhe të presidentit Trump në fillim të pandemisë ishin larg të dhënave aktuale.
Në prill, eksperti Anthony Fauci, tha se numri i të vdekurve do të arrrinte në “rreth 60 mijë”, ndërsa Presidenti Donald Trump, i cili më herët e kishte minimizuar koronavirusin si diçka të ngjashme me gripin sezonal, tha në muajin maj se numri i të vdekurve mund të arrinte nga 75 mijë deri në 100 mijë njerëz.
Parashikimet nga ekspertët flasin se numri i viktimave deri në fund të vitit mund të arrijë deri në 410 mijë.
Ekpertët po përpiqen të zhvillojnë një vaksinë dhe mund të sigurojnë miratimin për përdorimin e saj gjatë muajve në vazhdim.
Sipas raportimeve nga mediat amerikane Administrata e Ushqimit dhe e Barnave, po vlerëson një sërë udhëzimesh të reja e më të rrepta për autorizimin emergjent të një vaksine të mundshme kundër COVID-19.
Kompanitë farmaceutike duhet të vëzhgojnë të vëzhgojnë pjesëmarrësit në provat klinike të fazës së vonë për të paktën dy muaj, pasi të marrin dozën e dytë dhe përfundimtare të një vaksine eksperimentale.
Në bazë të udhëzimeve, do të vëzhgohen të paktën edhe pesë raste të rënda me COVID-19 mes vullnetarëve që morën një vaksinë neutrale, të njohur si placebo.
Nëse rregullat e reja miratohen, një autorizim për një vaksinë të re do të merrej pas zgjedhjeve presidenciale të 3 nëntorit. Presidenti Donald Trump ka thënë prej disa javësh se vaksina kundër koronavirusit mund të jetë në dispozicion ose në tetor ose menjëherë para ditës së zgjedhjeve.
Administrata e Ushqimit dhe Barnave dhe agjenci të tjera dhe ente rregullatore të qeverisë federale kanë parë që besueshmeria ndaj tyre ka rënë si rezultat i përpjekjeve të vazhdueshme të administratës për të rishikuar raportet dhe udhëzimet e tyre për të ruajtur pikëpamjet e zotit Trump lidhur me natyrën e pandemisë./Jo.Be/Fjala.al
