Nga një grup i vetëm, sezoni i ri rikthehet tek formula e vjetër me dy nivele. Kryesia e Federatës Shqiptare të Basketbollit, e mbledhur të martën në mbrëmje në kryeqytet, ka marrë disa vendime të rëndësishme sa i përket sezonit të ri të koshit shqiptar.
E drejtuar nga Presidenti i saj, Avni Ponari, dhe me praninë e 5 prej 7 anëtarëve të zgjedhur të saj, organizmi që qeveris koshin në vend ka anuluar vendimin e saj të mëparshëm.
Vendim që parashikonte zhvillimin e kampionatit të sezonit të ardhshëm me një kategori të vetme për meshkuj, duke rikthyer formulën e sezonit të shkuar, të mbetur të papërfunduar për shkak të epidemisë së virusit korona. Pra, sikundër ka nisur edhe sezonin e shkuar, edhe këtë sezon, Kampionati Kombëtar i Basketbollit për Meshkuj do të zhvillohen me dy nivele, me Superligën dhe me Kategorinë e Parë, të përbërë nga 6 skuadra secila.
Duke qenë se sezoni i shkuar është cilësuare zyrtarisht si i papërfunduar dhe pa fitues, pa zbritje nga kategoria dhe ngjitje më lart, skuadrat që do të përbëjnë dy grupet e sezonit të ri, do të jenë po ato të sezonit të shkuar, pavarsisht renditjes që mbanin deri në mesin e marsit, kur edhe gara u ndërpre.
Ndërkohë, për të lehtësuar barrën financiare, FSHB-ja vendosi të përgjysmojë tarifën e regjistrimit për të gjitha ekipet pjesëmarrëse në Kampionatin Kombëtar, si për femra, ashtu edhe për meshkuj, por edhe për të rinj dhe për të reja.
Po kështu, Kryesia e Federatës vendosi që të përkrahë 4 skuadrat pjesëmarrës në edicionin e ri të Ligës Unike me Kosovën, duke mbuluar shpenzimet e tyre të udhëtimit. Data e nisjes së sezonit të ri të basketbollit shqiptar është caktuar paraprakisht 15 nëntori 2020.
La.Mi/Fjala.al
