“Fake News”-et që i publikon vetë përmes ish-avokatit në Romë, Profeti i Kokoshkave po i përdor për të shmangur vëmendjen e publikut nga aferat skandaloze të biznesit të ri qindra milion euro të Arbitrazhit Ndërkombëtar, që kërcënojnë seriozisht financat publike dhe taksapaguesit shqiptarë”.
Kështu thotë zëdhënësi i Presidentit Ilir Meta, Tedi Blushi, i cili shprehet se shkelja flagrante e Kushtetutës dhe e ligjeve, për të paguar me lekët e taksapaguesve shqiptarë, biznesin e ri kriminal, përbëjnë përgjegjësi të rëndë penale për çdo zyrtar të shtetit shqiptar.
Sipas tij, “Profeti i Kokoshkave apo Gruaja e Bilalit” ia ka marrë dorën pagesave në të zezë, jo vetëm për një foto elektorale, por në çdo sekondë të mbijetesës së tij në karrigen e pushtetit të blerë me banda dhe lekë të zeza prej katër vitesh.
Në mbyllje thotë se “Asnjë formulë dhe marifet nuk e shpëton nga përgjegjësitë e rënda që ka për kriminalizimin e pushtetit dhe bllokimin e integrimit europian”.
Ky reagim vjen pasi Kryeministri Edi Rama shkroi se “Çfarë shëmtie! Të paguash para të zeza për të përhapur në botë shpifje që sterrosin vendin ku të kanë bërë kryeministër, kryeparlamentar, president! Të blesh pisa të huaj për ta bërë pis atdheun ku shitesh si patriot i përvëluar. Pa adhe. Pa din, pa iman”.
Gjithçka vjen pas shkrimeve se ministria e Brendshme Italiane akuzon ish-kryeministrin Sali Berishën dhe Ilir Metën, se kanë aktivizuar këshilltarin Ilir Kulla për të publikuar në Itali, një fakenews që të nxiste rënien e qeverisë së Edi Ramës në Tiranë./Bl.Ba/Fjala.al
