Policia ka finalizuar sot operacionin e koduar “Akciza” duke zbatuar 6 masa sigurimi të Gjykatës së Shkallës së Parë Tiranë si dhe shpalljen në kërkim të dy shtetasve të tjerë, që kanë lidhje me kontrabandën e mallrave pa akcizë.
Hetimet për zyrtarët e Agjencisë Kombëtare të Burimeve Natyrore kanë nisur pas kallëzimit penal të drejtorit të përgjithshëm të “Albpetrol”.
Pas hetimeve ka rezultuar se “Phoenix Petroleum” e cila është në pronësi të Isuf Berberit dhe Naim Kasa, me marrëveshje Hidrokarbure të miratuar nga Këshilli i Ministrave dhe të ndjekur për ecurinë e saj nga AKBN ka shfrytëzuar disa puse nafte.
Me qëllim plotësimin e detyrimeve për Programin Minimal të Punës, apo investimeve të detyrueshme për këto puse nafte, dhe në kushtet kur këto investime nuk i ka kryer, kjo shoqëri ka paraqitur në AKBN, tetë fatura të falsifikuara për shërbime që realisht nuk i ka përfituar nga kompania amerikane Black Swan Energy Service.
Falsiteti i këtyre faturave është konfirmuar nga kompania gjyqësore amerikane dhe vlera totale e tyre është 1. 299.000 USD.
Punonjësit e AKBN të arrestuar, Denis Durrësi, Qani Hoxha dhe Rezarta Qose Sulejmani, si dhe ish drejtori i OST-së Klodian Gradeci që është shpallur në kërkim, kanë certifikuar në mënyrë të kundraligjshme punimet e pakryera të pasqyruara në këto fatura si punime të kryera.
Po kështu, punonjësit e administratës tatimore, Arben Doda dhe Simon Marku kanë përpiluar një raport kontrolli në kundërshtim me ligjin duke bërë të mundur që kjo administratë të pësojë një dëm ekonomik prej 568.000 USD.
Dëmi që ka pësuar në mënyrë të drejtpërdrejtë AKBN nga veprimet e kundraligjshme të punonjësve të saj është 1.472.766 USD.
Ditën e sotme kanë rënë në pranga 5 punonjës të Agjencisë Kombëtare të Burimeve Natyrore, ndërsa një tjetër u la në “arrest shtëpie”.
Në lidhje me këtë ngjarje, policia ka shpallur në kërkim edhe biznesmenin Isuf Berberi, aksioner i kompanisë “Fufarma” dhe Klodian Gradeci, ish-drejtor i OST, që ka qenë në postin e Drejtorit të Hidrokarbureve në AKBN në kohën kur janë konstatuar shkeljet.
“Fjala.al” ka zbuluar se Berberi ka udhëtuar ditën e hënë nga Tirana drejt Turqisë. Biznesmeni është i përfshirë edhe në biznesin e hidrokabureve./Bl.Ba/Fjala.al
