Shqipëria ka mbërritur në Kazakistan, teksa vetëm dy ditë e ndajnë nga ndeshja e vlefshme për Ligën e Kombeve. Përpara dy transfertave, trajneri Reja ka mësuar përfundimisht 3 mungesat që nuk do t’i ketë në dispozicion për ndeshjet ndaj Kazakistanit dhe Lituanisë.
Thomas Strakosha, Jon Mersinaj dhe Myrto Uzuni nuk do të jenë të gatshëm për këto dy transferta. Gardiani kuqezi shfaqi probleme fizike, të cilat ia pamundësuan daljen në fushë për t’u stërvitur.
Ndërsa Mersinaj dhe Uzuni vuajnë nga disa shqetësime fizike dhe u duhet të qëndrojnë disa ditë pushim për të nisur më pas rikuperimin.
Etrit Berisha pritet që jo vetëm të jetë titullar, por edhe kapiten i Kombëtares. Përpara portierit të SPAL-it, trajneri Reja do të testojë treshen Gjimshiti, Dermaku dhe Kumbulla. Kjo zgjedhje vjen në bazë të testeve që ai ka bërë gjatë stërvitjeve në Durrës.
Nga krahët, dilema qëndron në linjën e djathtë. Mungesa e Hysajt dhe tashmë edhe e Uzunit, ka bërë që trajneri të mendojë për një strategji të re. Frederik Veseli dhe Albi Doka janë përzgjedhur si dy lojtarët më të përshtatshëm për linjën e djathtë.
Në anën tjetër, Memolla shihet më favorit në krahasim me Lorenc Trashin. Mesfusha i besohet Keidi Bares dhe Amir Abrashit të cilët do të kenë në mes Sherif Kallakun. Emri i ri i kombëtares pritet të debutojë pasi shihet si më i favorizuar në krahasim me Çekiçin dhe Laçin. Sulmi i besohet dyshes Rei Manaj dhe Armando Broja, ndërkohë një alternativë është edhe Giacomo Vrioni, sulmuesi i Juventus.
Fj.Ak/Fjala.al
