Një aksident i rëndë ka ndodhur ditën e sotme rreth orës 14:20 në rrugën rajonale Mitrovicë-Pejë të Kosovës. Si pasojë e këtij aksidenti, ka humbur jetën një vajzë 5-vjeçare.
Në aksident u përfshinë dy makina, ku njëra prej tyre ka dalë jashtë rrugës. Si pasojë makina që doli jashtë rrugës ka goditur një grua dhe vajzën e mitur. Gruaja është dërguar me urgjencë në spital, ndërkohë që e mitura nuk ja ka dalë të mbijetojë dot.
Lajmin për mediat kosovare e ka konfirmuar zëdhënësi i Policisë së Kosovës për rajonin e Mitrovicës, Avni Zahiti.
“Sot rreth orës 14:20, në rrugën rajonale Mitrovicë – Pejë, gjegjësisht në fshatin Runik të Skenderajt, ka ndodhur një aksident trafiku, ku për pasojë një (këmbësore) fëmijë i moshës pesë vjeçare ka vdekur, ndërsa lëndime trupore ka pësuar edhe një këmbësore e moshës madhore. Bazuar ne hetimet fillestare në aksident ishin të përfshira dy automjete civile me targa vendore, ku si pasojë e aksidentit njëra nga veturat del jashtë shiritit rrugor ku në trotuar godet dy këmbësoret të cilat me urgjencë ishin dërguar në QKMF- Skenderaj, me ç’ rast mjeku ka konstatuar vdekjen e viktimës”, tha Zahiti.
Ndërkohë, drejtuesit e dy automjeteve të përfshira në aksident u arrestuan nga Policia si dhe u është caktuar masa e ndalimit prej 48 orëve.
Pa.Va/Fjala.al
