Presidenti Ilir Meta ka reaguar sërish në rrjetet sociale duke u shprehur se përshkallëzimi artificial, siç e konsideron ai, i tensioneve politike ka pasoja të rënda për shëndetin e qytetarëve në vend.
Me anë të një postimi, Kreu i shtetit ka shpërndarë kronikën e “VOA”, ku thuhej se në vendin tonë ka patur një rritje me 15% të shifrave të të infektuarve. Meta i bën thirrje qeverisë t’i rikthehet marrëvëshjes së 5 qershorit.
Postimi i Presidentit:
“Përshkallëzimi artificial i tensioneve politike në vend, që nga rrafshimi i pabesë dhe i paligjshëm i Teatrit Kombëtar në kulmin e pandemisë, e sidomos prishja e njëanshme e Marrëveshjes së 5 Qershorit nga Kryeministri në detyrë, jo vetëm që nuk i shërben stabilitetit politik dhe bllokon çeljen e negociatave për anëtarësim në BE, por ka patur dhe ka pasoja të rënda për shëndetin dhe jetën e qytetarëve, veçanërisht për ekonominë e tyre.
Koha për t’iu rikthyer Marrëveshjes së 5 Qershorit, si edhe bashkëpunimit për mirëmenaxhimin e pandemisë, është tani”, shkruan ai.
Ditët e fundit kryeministri Rama dhe Presidenti Ilir Meta kanë pasur debate të shumta ditët e fundit, duke sulmuar shpesh njeri-tjetrin në distancë. Kreu i shtetit e ftoi në debat publik, ndërkohë kryeministri iu përgjigj duke e thumbuar se fillimisht duhet të “sqarohet me Monika Kryemadhin”. Kjo gjë duket se e acaroi Presidentin, i cili bëri një sërë reagimesh të tjera dhe tani vijon të hedhë akuza drejt qeverisë.
Pa.Va/Fjala.al
