Rrok Pepaj, babai i autorit të dyshuar të vrasjes së dy kushërinjve për vjedhjen e kanabisit në Malësi të Madhe, do të qëndrojë në burg të paktën deri në përfundim të hetimeve. Togat e zeza të qytetit verior pranuan kërkesën e prokurorisë duke caktuar masën e sigurisë “arrest me burg”, ndaj 62-vjeçarit.
Babai i Danjel Pepës, 25-vjeçarit të dyshuar si autori i vrasjes së Vilson Çutajt dhe Klement Pepajt në Malësi të Madhe, akuzohet për dëshmi të rreme dhe bashkëpunim në kultivimin e kanabisit, por para gjykatës ai i mohoi akuzat. Ai ishte njeriu që ndihmoi policinë për të gjetur trupat e dy të rinjve që dyshohet se i vrau i biri. Gjatë seancës së djeshme përpara trupit gjykues ai mohoi se kishte dijeni për krimin e dyfishtë dhe kultivimin e drogës.
Rrok Pepaj, babai i autorit të dyshuar të vrasjes së dy kushërinjve për vjedhjen e kanabisit në Malësi të Madhe, mohoi në gjykatën e Shkodrës të kishte dijeni për krimin dhe kultivimin e drogës. 62-vjeçari tha se në male ai mblidhte boronica dhe nuk e dinte për hashashin. Ndërsa për konfliktin që dyshohet se u bë shkak për krimin, tha se dinte vetëm se të birin e kishin dhunuar.
Pavarësisht pretendimeve, gjykata e mbajti atë në qeli me dy akuza. “Nuk kam pasur dijeni për parcelën e drogës, në mal dilja me bagëti dhe për të mbledhur boronica. E njoh zonën, por nuk e kam ditur ku ka parcela droge. Djalin s’e kam parë prej disa ditësh. Di vetëm që ka pasur një ngatërresë dhe e kanë rrahur disa persona”, i tha i moshuari gjykatës.
Por prokuroria ka dyshime se 62-vjeçari tentoi të fshehë të vërtetën e vrasjes së dyfishtë dhe mund të ketë bashkëpunuar me të birin për kultivimin e parcelës me hashash në vendin e quajtur “Rranza e Grecajve”. Ndaj gjyqtarja, Ermira Dedja, pranoi kërkesën e prokurorit Albert Murçaj për ta mbajtur ne qeli 62-vjeçarin. Ai u vu në pranga pas gjetjes së trupave të pajetë të Vilson Çutajt dhe Klement Pepajt pranë një parcele me 29 rrënjë kanabis, 5 ditë pasi ishin zhdukur pa gjurmë bashkë me autorin e dyshuar Danjel Pepaj.
Pista kryesore që po hetohet nga policia për konfliktin mes tre kushërinjve që përfundoi në vrasje është vjedhja e një sasie kanabisi për të cilën akuzohej Danjel Pepaj. Ky i fundit, tashmë është në arrati dhe dyshohet se ka kaluar kufirin drejt Malit të Zi, ndaj policia ka kërkuar bashkëpunimin e autoriteteve të vendit fqinj për ta gjetur dhe arrestuar./Jo.Be/Fjala.al
