Partia Demokratike të hënën pritet të nisë fazën finale për skanimin e kandidatëve për deputetë.
Votimet në qarkun e Tiranës u mbyllën ditën e shtunë dhe tashmë 495 emra kanë kaluar dy fazat e para të përzgjedhjes.
Mësohet se ditën e nesërme, Komisioni i Vlerësimit të Kandidatëve, do të hartojë raporte për secilin kandidat, që mund të sjellë më shumë popullaritet për secilën listë.
Më pas, komisioni i vlerësimit, do t’i dërgojë kryesisë së PD-së rreth 250 kandidatë.
Në këtë moment, vlen të theksohet se lista që do dalë nga ky proces do të përbëjë 80% të listës përfundimtare, pasi 20% i është caktuar kryesisë për t’i zgjedhur që do të jenë figura të spikatura, intelektualë etj.
Nga i gjithë procesi në 12 qarqe të vendit, janë skualifikuar 17 emra, ku bien në sy emrat e tre ish-kryebashkiakëve, atij të Kukësit, Bashkim Shehu, ish-kryebashkiakut të Tropojës, Besnik Tusha dhe ish-kryebashkiakut të Pogradecit, Eduard Kapri.
Po kështu janë skualifikuar edhe tre ish-deputetë, Klevis Balliu dhe Hekuran Hoxhalli në qarkun e Korçës dhe Astrit Veliaj në Berat dhe bashkë me ta dhe 11 emra të tjerë zyrtarësh demokratë./Re.D/Fjala.al
