Kapiteni kuqezi kërkon nga skuadra të lënë pas humbje e hidhur me baltikët në Tiranë. Humbja me Lituaninë në Tiranë është një episod i hidhur që duhet lënë pas sa më shpejt dhe, për kapitenin kuqezi, Etrit Berisha, ndeshja e së mërkurës me baltikët është një mundësi e mirë për ta bërë këtë. “Unë mendoj që Lituani luajti shumë mirë në ndeshjen e parë, – ka thënë ai. – Taktikisht kanë luajtur shumë mirë dhe na kanë vënë në vështirësi.”
“Ndoshta edhe ne nuk e kemi bërë ndeshjen më të mirë që duhet të bënim, – ka vijuar portieri nga Kosova. – Por tani vlen ndeshja e nesërme, ku ne duhet të jemi jashtëzakonisht të përqendruar dhe përgatitur. Do të jetë një ndeshje kyçe për rrugëtimin tonë.” Përtej barazimit pa gola me Kazakistanin në Almati, gardiani i portës kuqezi ka parë shenja pozitive në atë takim, teksa thotë: “Ndeshja kundër Kazakistanit ka qenë ndeshje pozitive, ku kam parë një grintë shumë më të mirë se kundër Lituanisë.”
“Gjithë çunat e dinë rëndësinë e ndeshjes, – ka vijuar ai. – Nesër duhet të japin 110% për të arritur objektivin tonë. Kundër Lituanisë kemi humbur dhe nuk duhet të lejojmë që ata të marrin epërsinë.” Për Berishën, Kombëtarja kuqezi po përjeton një ndërrim brezash. “Në grup kemi lojtarë të rinj, – ka pohuar ai. – Ka shumë prurje të reja për shkak edhe të mungesave. Djemtë e rinj kanë kualitete, por iu duhet kohë që të luajnë me Kombëtaren dhe të ambienton.”
“Duhet të japim maksimumin e tyre. Ne më të vjetrit duhet t’i ndihmojmë me të gjitha mënyrat. Kur të arrihet vetëbesimi në skuadër, gjithë ekipi do të përfitojë”, – ka përfunduar Berisha. Etrit Berisha ka mbajtur shiritin kuqezi në mungesë të mbrojtësit Elseid Hysaj, të pezulluar për këto dy takime.
la.mi/fjala.al
