Kombëtarja ka zhvilluar stërvitjen e fundit në Kazakistan, teksa sot paradite fluturon drejt Lituanisë, për t’u përgatitur për sfidën e radhës në Ligën e Kombeve.
Në fushë kanë zbritur lojtarët që nuk kanë marrë minuta në ndeshjen ndaj Kazakistanit, ose edhe tre zëvendësimet që luajtën më pak sesa dhjetë minuta.
FSHF bën me dije se të gjithë lojtarët janë në dispozicion për sfidën ndaj Lituanisë, me përjashtim të Amir Abrashit i cili mori një goditje në kavilje rreth minutës së 85-të.
Mesfushori është i vetmi që nuk mund të llogaritet si pjesë e Kombëtares në sfidën e nesërme. Trajneri Edi Reja pritet të bëjë disa ndryshime në formacion këtë herë, ndërsa skema do të jetë po e njëjta 3-5-2.
Teksa në portë pritet të jetë sërish Berisha, tashmë edhe në rolin e kapitenit. Në repartin e mbrojtjes, trajneri pritet t’i japë minuta Enea Mihajt në vend të Dermakut, i cili do të plotësohet me Gjimshitin dhe Kumbullën.
Nga krahët, mund të ketë debutim të Albi Dokës në të djathtë ndërsa Lenjani në krahun tjetër mund të rikthehet titullar në Kombëtare. Në mesfushë pritet të jetë Keidi Bare dhe përkrah tij Kallaku, dhe në rast mungese të Abrashit, në vend të tij projektohet Qazim Laçi ose Endri Çekiçi.
Edhe sulmi pritet të ketë ndryshime. Ndër emrat e rinj është Giacomo Vrioni që mund të debutojë duke zënë vendin e Manajt, dhe përkrah tij të aktivizohet sërish Armando Broja, por një alternativë është edhe Taulant Seferi./Fi.Ak/Fjala.al
