Partia Agrare Ambientaliste të martën ka kritikuar qeverinë Rama se ka dhuruar çdo muaj miliona euro për oligarkinë, ndërsa ka shkurtuar buxhetin për bujqësinë.
Në një deklaratë të shpërndarë për mediat, PAA sqaroi se shifrat e buxhetit afatmesëm 2020-2022, i nxjerrin bojën fasadës demagogjike të mazhorancës.
Ajo tregoi se ka përgatitur një program konkret për ndaljen e braktisjes dhe varfërimit të zonave rurale, për mbështetjen e fermerëve, për skema sigurimi risku nga fatkeqësitë natyrore, për sigurinë ushqimore dhe ekonominë e gjelbërt.
Ky program i përgatitur nga ekspertët më të mirë të politikave bujqësore do të prezantohet për publikun dhe do të jetë një ftesë e hapur për bashkëpunim të pa kushtëzuar por të bashkuar.
Kujtojmë se kryeministri Edi Rama deklaroi ditën e sotme se do të heqë akcizën e naftës, duke realizuar kështu një kërkesë të hershme të fermerit shqiptar. Rama tha se ky vendim pritet të hyjë në fuqi me datë 1 janar, 2021. Kryeministri, gjithashtu njoftoi se karburantit bujqësor do t’i hiqet edhe taksa e qarkullimit dhe ajo e karbonit. Mësohet se nga ky vendim, sipas qeverisë, do të përfitojnë rreth 47 mijë fermerë të regjistruar me NIPT dhe të tjerët që do të duhet të regjistrohen./la.mi/Fjala.al
