Rreth 3 mijë efektivë të policisë do të jenë në terren nga dita e enjte për të kontrolluar nëse qytetarët i mbajnë maskat ose jo.
Nga informacionet paraprake, mësohet se ditën e nesërme efektivët do të jenë në terren më shumë për të këshilluar dhe për të ndërgjegjegjësuar qytetarët të mbajnë maskat.
Ata do të jenë të përqendruar në kontrollin e automjeteve, ku qytetarët që janë të vetëm në makinë nuk janë të detyruar ta mbajnë maskën, por kjo nuk vlen në rastet kur kemi të bëjmë me më shumë se 2 persona. Për qytetarët që janë në rrugë,nuk do të ketë pika specifike kontrolli, por efektivët e policisë do të jenë të shpërndarë edhe nëpër lagje për të siguruar zbatimin në masë të mbajtjes së maskës.
Vlera e gjobës do të faturohet tek energjia elektrike, ndërsa të gjithë ata qytetarë që do të kapen pa maskë dhe nuk e kanë mjetin e identifikimit me vete, do të shoqërohen në komisariat ku edhe do të bëhet identifikimi i personit e më pas do t’i vendoset gjoba.
Sipas autoriteteve, kjo masë po merret për të parandaluar një izolim të dytë si ai i marsit. Ndërkohë sot, një ditë para se ky vendim të hyjë në fuqi, në vendin tonë është shënuar një rekord me 5 viktima dhe 202 raste të reja pozitive.
Pa.Va/Fjala.al
