Policia e Shtetit ka zbuluar se ka vendosur 171 masa administrative me vlerë 3000 lekë të reja, për personat që nuk kanë vendosur maskën ditën e sotme.
Në njoftimin e Bluve theksohet se sot është bërë një monitorim intensiv i situatës në terren, nëse qytetarët kishin vendosur ose jo maskë.
“Në rastet kur janë konstatuar qytetarë që nuk kishin maska ose që i kishin por nuk i vendosnin në fytyrë, shërbimet e Policisë i kanë këshilluar ata për vendosjen e tyre.
Gjatë kontrolleve në të gjithë vendin, shërbimet e Policisë kanë vendosur edhe gjoba për qytetarët që nuk kishin vendosur maskat dhe as nuk i kishin ato me vete. Në të gjithë vendin janë vendosur 171 masa administrative me vlerën 3 000 lekë secila. Shërbimet e Policisë do të jenë prezente çdo ditë, në ambiente të ndryshme në të gjithë vendin dhe në rast se do konstatojnë qytetarë që nuk kanë vendosur maskat mbrojtëse, do të marrin masat administrative sipas Aktit Normativ.”, thuhet ndër të tjera në njoftimin e Policisë.
Vendosja e maskave me detyrim hyri në fuqi nga sot në vendin tonë për parandalimin e përhapjes së Covid-19. Kujtojmë që ditën e sotme janë shënuar 5 viktima dhe 257 raste të reja në vendin tonë, dita me numrin më të lartë të rasteve pozitive që nga fillimi i pandemisë.
Pa.Va/Fjala.al
