Ish-kryeministri i Kosovës, Albin Kurti iu ka bërë thirrje të gjithë shqiptarëve me të drejtë vote në Amerikë që të votojnë për kandidatin Joe Biden. Kreu i Vetëvendosje ka dalë kundër Trump.
Përmes një video-mesazhi në Facebook, Kurti e arsyeton këtë gjë duke thënë se Joe Biden është një mbështetës i palëkundur i shqiptarëve.
“Që nga vitet e 90-ta, Joe Biden është një mbështetës i palëkundur i shqiptarëve në Ballkan. Ishte ndër të parët që denoncoi fashizmin serb në epokën e Millosheviçit; që bëri thirrje për ndërhyrje amerikane në Bosnjë, dhe më pas në Kosovë, që kërkoi ndjekjen penale të kriminelëve serbë të luftës; dhe që mbështeti pavarësinë dhe njohjen e Republikës së Kosovës”, shprehet Kurti.
Ende nuk dihen arsyet pse Albin Kurti ka bërë këtë deklaratë. Por, thashetheme në korridoret e politikës thonë se ishte ndërhyrja e amerikanëve që bëri të mundur rrëzimin e qeverisë Kurti në Kosovë. Kujtojmë se Kurti qeverisi vetëm për 51 ditë pastaj u rrëzua duke mos fituar votëbesimin në parlament.
la.mi/Fjala.al
