Kush nuk i jep dorën grave, nuk mund të marre nënshtetësinë gjermane. Ky është një vendim i marrë nga Gjykata Administrative e landit Baden-Württemberg në Mannheim.
Vendim i cili erdhi pas një situate të papritur me të cilën u përball nënpunësja që jep çertifikatat e nënshtetësisë.
Një libanez 40-vjeçar, i cili jeton në Gjermani që prej vitit 2002, dhe ndërkohë punon si mjek specialist në një klinikë, nuk ka dashur ti japë dorën nënpunëses gjermane kur do të firmosej nënshtetësia, shkruan DW.
Ai pretendoi se i kishte premtuar së shoqes – një myslimaneje me nënshtetësi gjermane dhe origjinë siriane – që të mos i jepte kurrë dorën ndonjë gruaje tjetër, por zyra përkatëse ia refuzoi marrjen e nënshtetësisë.
Libanezi e çoi çështjen deri në gjykatë, duke pretenduar se vendimi i marrë për mos ta pajisur me nënshtetësinë gjermane ishte i padrejtë, pasi ai ishte për barazi gjinore, dhe se nuk i jepte dorën as burrave dhe as grave.
Por gjykata argumentoi se ai nuk pranon t’i japë dorën një gruaje ‘si rezultat i një konceptimi fundamentalist të kulturës dhe të vlerave’ dhe nuk pranon që t’i përshtatet mënyrës së jetesës në Gjermani. Sipas gjykatës, dhënia e dorës të tjerëve ka ‘rrënjë të thella dhe përbën bazën e bashkëjetesës’ mes njerëzve në Gjermani.
Në vendimin e gjyjatës u tha po ashtu se pandemia nuk mund të përdoret si argument për mos dhënien e dorës, pasi për shkak të traditës së gjatë historike që ka ky veprim gjykatësit nuk mendojnë se dhënia e dorës si ritual do të mënjanohet përgjithmonë. /Ra.My.Fjala.al/
