Mbrëmja e sotme do të jetë tepër e veçantë për futbollin europian pasi starton sezoni i ri i Uefa Champions League.
Ky start do të jetë ndryshe nga sezonet e shkuara pasi ky eveniment futbollistik do të organizohet sipas protokolleve anti-Covid. Që në ditën e parë të sezonit të ri, Champions na rezervon disa supersfida si: Chelsea-Sevilla, Lazio-Borussia Dortmund apo edhe PSG-Manchester United. Skuadra e Frank Lampard ka zhvilluar një super merkato dhe pritet me interes debutimi i lojtarëve të rinj në këtë kompeticion. Përballë do të kenë skuadrën e Lopeteguit që u shpall kampione e Europa League.
Lazio e Inzaghit do të përballet me verdhezinjtë e Lucien Favre. Në këtë sfidë mund të debutojë edhe Vedat Muriqi, lojtari kosovar që u transferua tek bardhekaltërit verën e shkuar. PSG do të presë në Paris anglezët e Manchester United. Kjo është një sfidë që sjell kujtime të këqija për francezët, të cilët u eliminuan nga United 1 vit më parë në Champions League. Kjo do të jetë një sfidë ku skuadra e Tuchel do të kërkojë hakmarrjen ndaj United të Solskjaer. Ndërkohë sfida të tjera që do të na shoqërojnë këtë mbrëmje janë Dinamo Kiev-Juventus, Zenit-Club Brugge, Leipzig-Basaksehir, Rennes-Krasnodar dhe Barcelona-Ferencvaros. Kjo do të ishte një sfidë unike, për Myrto Uzunin, i cili është pjesë e Ferencvaros dhe do të përballej me Lionel Messin në “Camp Nou”.
Por ishte Covid-19, ai që nuk lejoi Uzunin të udhëtonte në Spanjë, pasi lojtari i kombëtares rezultoi pozitiv dhe është karantinuar në banesë. Megjithatë, ai do të ketë mundësi të përballet me Messin në sfidën e kthimit.
Pa.Va/Fjala.al
