Veprimtaria më prestigjioze e klubeve të Evropës, Liga e Kampioneve, ka ngritur të martën siparin e fazës së grupeve, teksa janë luajtur 8 ndeshjet e para të 4 prej grupeve dhe golat nuk kanë munguar, teksa edhe ekipet favorite kanë bërë detyrën.
Kështu, në njërën prej dy ndeshjeve që u luajtën duke nisur më herët, Juventusi nuk ka gabuar në Kiev përballë Dinamos vendase, duke fituar me rezultatin 2-0, me dy gola të shënuar në pjesën e dytë, nga i njëjti lojtar, Morata.
Ndërkaq, po në kuadër të grupit G, Barcelona ka kapërcyer nisjen më të mirë të Ferencvaroshit, duke vijuar të marrë frenat e lojës në dorë e duke e mbyllur pjesën e parë me një epërsi të dyfishtë, pas një 11-metërshi të saktë të Mesit dhe një goli të Ansu Fatisë.
Katalanët gjejnë edhe golin e 3-të me fillimin e pjesës së dytë dhe, ndonëse Pike del nga loja me karton të kuq në minutën e 68-të dhe hungarezët shkurtojnë shifrat me një 11-metërsh të saktë, e fitojnë takimin me shifrat 5-1, pas një goli të Pedrit dhe më pas, të Dembelesë në fund.
Ndërkaq, në takimin tjetër që nisi më herët, Klub Bryzhi fitoi 2-1 në Shën Pjetërburg ndaj Zenitit vendas, në një ndeshje ku të 3 gola u realizuan në pjesën e dytë dhe të 3 nga belgët, që sidoqoftë e gjetën fitoren vetëm në sekondat e fundit të shtesës prej 4 minutash.
Po në kuadër të grupit F, Lacios iu deshën vetëm 23 minuta për të gjetur dy herë rrugën e rrjetës ndaj Dortmundit dhe për ta mbyllur në epërsi të dyfishtë pjesën e parë.
Ndonëse Haland shkurtoi shifrat për gjermanët në pjesën e dytë, Lacio gjen edhe golin e 3-të dhe e fiton ndeshjen me shifrat 3-1.
E njëjta tablo ishte edhe në Gjermani, ku Lajpcigu shënoi dy herë brenda 20 minutave të para, për ta mbyllur pjesën e parë në epërsi të dyfishtë ndaj Istambul Bashakshehirsporit, një rezultat ky që mbetet në fuqi deri në fund.
Po në kuadër të grupit H, Mançester Junajtid e mbylli me një epërsi minimale pjesën e parë në Francë ndaj Paris SG-së, falë një 11-metërshi të ekzekutuar dy herë dhe të realizuar herën e dytë nga Bruno Fernandes.
Por ka qenë francezi i anglezëve, Antoni Marsial, ai që shkaktoi një autogol në pjesën e dytë dhe, kur po dukej se të dyja skuadrat po detyroheshin të kënaqeshin nga një pikë, Rashford shënon golin e fitores për Mançester Junajtid, që triumfon kështu në Paris.
Në grupin F, takimi midis Çellsit dhe Seviljes u mbyll me rrjeta të paprekura, ndërsa Rena dhe Kransodari shënuan nga një gol secila në pjesën e dytë dhe ndanë nga një pikë.
la.mi/Fjala.al
