Kreu i Grupit Parlamentar Demokrat, Myslim Murrizi ka njoftuar me anë të një statusi në rrjetet sociale se partia e tij Lëvizja Demokratike Shqiptare është regjistruar në Gjykatën e Tiranës dy ditë më parë.
Ai thotë se nisma ka qenë e katër deputetëve, përfshirë vetë atë, bashkë me Alban Zenelin, Halit Valteri dhe Arlind Çaçanin.
Murrizi fton çdo shqiptar të mërzitur nga partitë e tjera që të bashkohet me LDSH.
“Me datë 19 tetor 2020 u regjistrua zyrtarisht në gjykatën e rrethit gjygjësore Tiranë si Parti Politike. Levizja Demokratike Shqiptare. Me nismën e 4 deputetëve Myslim Murrizi, Alban Zeneli, Halit Valteri dhe Arlind Çaçani si dhe mbështetur nga 4602 firmëtarë nga çdo qark krijuam një subjekt politik.
Ndoshta e para Parti Politike që është krijuar në 30 vite pluralizëm,pa ish komunistë, pa ish sigurimsa dhe spiunë sigurimi, pa na i mbledhur firmat pushteti dhe Parti Politike që nuk është “shitur” nga njeri kryetar tek kryetari blerës siç ka jo pak të tilla. Ju “kërkojmë “ndjesë atyre që kanë programuar, dirigjuar apo strukturuar partitë politike në post-komunizëm në Shqipëri që nuk i pyetëm dhe nuk ju morëm leje.
Ju “kërkojmë” ndjesë edhe ish funksionarëve të lartë të PPSH dhe bashkëpunëtorëve të Ramiz Alisë që Partia Levizja Demokratike Shqiptare nuk është pjellë e tyre. Ftojmë çdo Shqiptarë që nuk mërzitet nga ky fakt, t’i bashkohet LEVIZJES DEMOKRATIKE SHQIPTARE për të ndikuar me fuqinë e VOTES në 25 prill 2021 për një politikë ndryshe. Partia Levizja Demokratike Shqiptare do të konkuroj në çdo qark vetëm me LISTA 100% TE HAPURA”, shkruan Murrizi.
Pa.Va/Fjala.al
