Është depozituar sot në Kuvend projektligji për blerjen e vaksinës anti-covid. Në këtë projektligj përcaktohet që të blihet vaksina kur të dalë në treg, marrëveshja e cila është lidhur me kompaninë ‘Covax’.
Në këtë projektligj përcaktohet qartë se 1 milion e 140 mijë vaksina anti-COVID do të blihen për 3.9 milionë dollarë.
Shuma do të paguhet nga buxheti për Ministrinë e Shëndetësisë dhe Mbrojtjes Sociale dhe Fondi i Sigurimit të Detyrueshëm të Kujdesit Shëndetësor.
Në tekstin e projektligjit të dërguar në Kuvend thuhet se: Ratifikimin e marrëveshjes së angazhimit, ndërmjet Këshillit të Ministrave të Republikës së Shqipërisë, përfaqësuar nga Ministria e Shëndetësisë dhe Mbrojtjes Sociale, dhe Aleancës GAVI, për pjesëmarrjen në strukturën globale të qasjes në vaksinat COVID-19 (Covax Facility), sipas tekstit që i bashkëlidhet këtij ligji.
Ndërkohë që miratimi i projektligjit theksohet se nuk ishte parashikuar më herët në projektet e Këshillit të Ministrave dhe është urgjencë prokurimimi i vaksinës anti-covid-19.
“Për Shqipërinë, anëtarësimi në këtë Aleancë dhe prokurimi i vaksinës nëpërmjet këtij mekanizmi ofron një vaksinë të sigurt dhe të certifikuar. Gjithashtu, kjo alternativë është më fleksibël dhe nuk ka kosto shtesë për shtetin shqiptar (kostoja finale është e njëjtë). Qëllimi i COVAX-it është përveçse prokurimi i një vaksine të sigurt kundër COVID-19 edhe sigurimi i kësaj vaksine te të gjitha shtetet, pavarësisht ekonomisë së tyre”.
“COVAX” është një nga mekanizmat që po nxit zhvillimin e vaksinave kandidatë anti-COVID. COVAX udhëhiqet nga Organizata Botërore e Shëndetësisë, dhe ka për qëllim që deri në fund të vitit 2021, të ketë shpërndarë 2 miliardë doza vaksinash në të gjithë botën.
Prioritet janë punonjësit e sektorit të shëndetësisë dhe më pas qytetarët në bazë të grupimeve të rrezikuara, duke përjashtuar nivelin e të ardhurave si kriter për vaksinimin.
Kujtojmë se vendi ynë po përballet ditët e fundit me shifra në rritje të rasteve me COVID-19, ashtu dhe si shumë vende të tjera të botës./Bl.Ba/Fjala.al
