Një incident ka ndodhur paraditen e sotme në përurimin e shtëpisë së Gjergj Fishtës. Ngjarja ka ndodhur në fshatin Fishtë të Lezhës.
Si pasojë raportohet se forcat e policisë kanë shoqëruar ish-deputetin Eduart Ndocaj, i cili njihet ndryshe si “kaubojsi”.
Mësohet se në momentin që gardistët kanë kërkuar që Ndocaj të dilte nga aktiviteti, ku nuk ishte i ftuar, ish-deputeti ka kërkuar që askush të mos e prekte, madje ka shtuar se gjithçka ishte një urdhër i kryeministrit Edi Rama.
“Ju lutem jeni pa ftesë, duhet të largoheni, e dëgjuat dhe kryetarin e Bashkisë”, i kanë thënë efektivët.
“Ka dhënë urdhër kryeministri që të mos jem në aktivitet. Mos më prekni me dorë se jam i operuar. Mos prekni, jam i operuar në stomak”, mësohet të jetë shprehur ai.
Ndocaj u shoqërua sot në polici. Ai kishte shkuar në aktivitetin e përurimit të shtëpisë së Gjergj Fishtës në fshatin Fishtë, ku ishte i pranishëm dhe kryeministri Edi Rama.
Ndocajt i është kërkuar që të largohej, por nuk është bindur dhe për këtë arsye ka ndërhyrë Garda. Bashkë me ish-deputetin, janë larguar edhe gazetarët nga aktiviteti./Bl.Ba/Fjala.al
