Gjykata Penale e Tiranës ka lënë në fuqi masën e sigurisë “Arrest me Burg” për ish-drejtorin e AKBN-së, Klodian Gradeci.
Gradeci akuzohet për shpërdorim detyre, teksa u arrestua pak ditë më parë në aeroportin e Rinasit.
Drejtori i Hidrokarbureve, i shpallur në kërkim për abuzimin 1.4 mln dollarë, është vetëdorëzuar.
Gradeci ka kërkuar një masë më të butë sigurie, me argumentin se është sëmurë, por kërkesa nuk është marrë parasysh nga trupi gjykues.
Arrestimi
Me t’u kthyer nga Turqia, Klodian Gradeci, 45-vjeç, u vendos në pranga në aeroportin e Rinasit, pasi Prokuroria kishte lëshuar disa urdhër-arreste ndaj disa zyrtarëve të AKBN-së.
Përveç Gradecit, janë arrestuar zyrtarët e tjerë të këtij institucioni Qano Hoxhaj, Denis Durrsi e Rezarta Sulejmanin, si dhe inspektorët e tatimeve Arben Dodën e Simon Markun.
Akuzat
Ata akuzohen se i kanë shkaktuar shtetit një dëm rreth 2 milionë Dollarë, permes falsifikimit te dokumenteve.
Sipas hetimeve ka rezultuar se kompania “Phoenix Petroleum”, kishte fituar të drejtën për të shfrytëzuar disa puse nafte, me detyrimin që të kryente investime, të cilat do të verifikoheshin nga AKBN.
Nga hetimet rezultoi se shoqëria “Phoenix Petroleum”, ka falsifikuar dokumentet për të përmbushur fiktivisht detyrimin për investim tek puset e naftës.
Zyrtarët e AKBN-në certifikuan faturat e paligjshme, duke i zyrtarizuar punimet si të kryera. Sipas hetuesve zyrtarët e tatimeve, Simon Marku dhe Arben Doda, përpiluan një raport kontrolli të paligjshëm duke plotësuar skemën e abuzimit./Re.D/Fjala.al
