Ministrja Elisa Spiropali, tha se çështjet e Reformës Zgjedhore nuk janë çështje urgjence për Komisionin e Venencias.
E ftuar në emisionin “Open”, Spiropali tha se ky vendim nuk do të ketë kosto për integrimin e vendit dhe sipas saj, vendi i ka bërë detyrat.
“Jemi 6 muaj para zgjedhjeve, nuk mund të hymë nëpër aventura ku do të na fusë Presidenti. Presidenti nxori një dekret nul për shtyrjen e zgjedhjeve dhe as partia e tij nuk doli në zgjedhje atë ditë. Çdo mëndje racionale dhe çdo shtet që ka një President që bën detyrën, e kupton që çështjet e reformës zgjedhore nuk janë çështje urgjence për Komisionin e Venecias.
Nxituam sepse është një infrastrukturë e tërë zgjedhore që duhet përgatitur, madje jemi shumë vonë dhe nuk mund të presim as tekat e Presidentit, as hamendjet e Monikës as ato të Bashës. Nuk ka asnjë kosto për vendin, Shqipëria i ka bërë detyrat e saj sa i takon një Reforme Zgjedhore. Komisioni i Venecias nuk mund ta shqyrtojë këtë çështje me urgjencë. E rëndësishme është që ne kemi një marrëveshje”, tha Spiropali.
Kujtojmë se Parlamenti rrëzoi sot dekretin e Presidentit Ilir Meta për Kodin Zgjedhor, pavarësisht edhe thirrjes së ndërkombëtarëve për të pritur opinionin e Komisionit të Venecias.
Pa.Va/Fjala.al
