Veprimtaria e dytë e futbollit në vend, Kupa e Shqipërisë, ka ngritur siparin e sezonit të ri me takimet e turit të 32-shes, që janë luajtur të dielën pasdreke. Veçoria e këtij sezoni është se të gjitha përballjet do të luhen me një takim të vetëm.
Teksa të gjitha ndeshjet e javës së parë të Kategorisë Superiore, Kategorisë së Parë dhe dhe asaj të Dytë të Kampionatit Kombëtar të Futbollit do të luhen më 4 nëntor, sezoni i ri ka nisur me Kupën e Shqipërisë të dielën pasdreke.
Aty ku skuadrat e turit të 32-shes kanë qenë ndarë paraprakisht në dy grupe me nga 16 skuadra, që u përballën me njëra-tjetrën në 8 çifte. Kështu, në grupin A, të 5 skuadrat e Kategorisë Superiore, Tirana, Laçi, Teuta, Bylisi dhe Kastrioti kanë bërë detyrën.
Ndërsa në 3 duelet midis ekipeve të Kategorisë së Parë, Korabi ka fituar në shtëpi ndaj Erzenit, Dinamo në fushë të huaj ndaj Flamurtarit, ashtu siç ka bërë edhe Egnatia e Rrogozhinës në Lezhë ndaj Besëlidhjes, por vetëm pas goditjes së 11-metërshave, pasi koha e rregullt dhe ajo shtesë u mbyllën në barazim 1-1.
Edhe në grupin B, 5 ekipet e Superiores, Kukësi, Skënderbeu, Partizani, Vllaznia dhe Apolonia, nuk kanë gabuar, ndërsa në duelet e kategorive inferiore, kanë triumfuar Pogradeci, Elbasani dhe Besa, kjo e fundit me një gol në kohët shtesë, pasi koha e rregullt u mbylle me rrjeta të paprekura.
Kupa e Shqipërisë
Turi i 32-shes:
Grupi A
Tirana – Shkumbini 4-1 (A1)
Laçi – Vora 3-0 (A2)
Teuta – Tërbuni 4-0 (A3)
Flamurtari – Dinamo 1-2 (A5)
Bylis – Veleçiku 2-1 (A4)
Kastrioti – Burreli 2-1 (A6)
Besëlidhja – Egnatia (pas 11.m 3-4) 1-1 (A7)
Korabi – Erzeni 2-0 (A8)
Grupin B
Kukësi – Maliqi 5-0 (B1)
Skënderbeu – Tomori 1-0 (B2)
Partizani – Iliria e Fushë-Krujës 5-0 (B3)
Vllaznia – Devolli 7-0 (B4)
Luftëtari – Elbasani 0-3 (B5)
Apolonia – Turbina 4-1 (B6)
Pogradeci – Oriku 9-1 (B7)
Lushnja – Besa (pas kohëve shtesë) 0-1 (B8)
la.mi/Fjala.al
