Turqia vijon të jetë në panik për shkak të tërmetit tronditës të mesditës së të premtes me magnitudë rreth 7 të shkallës rihter.
Mediat turke raportojnë këtë mëngjes se ka shkuar në 51 numri i viktimave nga tërmeti që tronditi qytetin e Izmirit.
Mes viktimave janë edhe tre shqiptarë të Kosovës. Lajmin e ka bërë të ditur ambasadori i Kosovës në Ankara, Ilir Dugolli.
Viktimat me origjinë nga Kosova janë Nazmije Dograjan, 64-vjeçe, Hatixhe Dogruja, 70-vjeçe dhe burri i saj Bajram Dogruja, 73-vjeç.
Shqiptarët nga Kosova, të larguar nga Prishtina që në 1956 dhe të vendosur në Izmir nuk mundën që të mbijetojnë nga tërmeti tragjik, pasi rrënojat i zunë poshtë nga shembjet e godinave.
Ndërkohë që deri më tani janë konfirmuar dy viktima edhe në ishullin grek, Samos, ku mësohet se kanë humbur jetën dy të rinj 15 dhe 17 vjeç.
Nga raportimet e fundit, bëhet e ditur se numri i të plagosurve ka shkuar në 896.
Autoritetet zyrtare turke njoftojnë se tërmeti i fortë është shoqëruar me qindra pasgoditje. Po ashtu mësohet se presidenti Erdogan ka inspektuar nga afër zonën e goditur nga tërmeti i fuqishëm.
Tërmeti në Detin Egje, me qendrën e tij pranë rrethit Seferihisar, u ndje shumë në Izmir, ku shkaktoi panik të madh tek qytetarët.
Shumë shtëpi dhe pallate u shembën, ndërsa ende vijojnë kërkimet nën rrënoja me shpresë për të gjetur njerëz të gjallë./Bl.Ba/Fjala.al
