Plot 11 lojtarë nga ekipi i parë i Ajax dhe Ajax B kanë rezultuar pozitivë me Covid-19.
Në këtë mënyrë trajneri i kampionëve të Holandës do të ketë në dispozicion vetëm 17 lojtarë në Champions League të martën ndaj Midtjylland.
Klubi i Amesterdamit nuk ka bërë publik se cilët lojtarë janë infektuar, por në listën e të ftuarve që kanë udhëtuar në Danimarkë këtë të hënë, ka mungesa me peshë si Dusan Tadic, Ryan Gravenberch, Davy Klaassen, André Onana apo dhe Maarten Stekelenburg.
Portieri i vetëm i thirrur është Kjell Scherpen, i cili rregullisht luan me Ajax B dhe do të bëjë debutimin në ekipin e parë të martën. Në listën e lojtarëve që udhëtojnë në Danimarkë janë argjentinasit Nicolás Tagliafico dhe Lisandro Martínez, si dhe meksikani Edson Álvarez.
Klubi do të testojë edhe një herë lojtarët që janë jashtë dhe, nëse ata testojnë negativë, mund t’i thërrasë ata në minutën e fundit për ndeshjen e Danimarkës.
Ajax renditet i treti në grupin D të Ligës së Kampionëve me një pikë të vetme dhe një rezultat të dobët kundër Midtjylland, në fund të grupit pas dy humbjeve radhazi, do të komplikonte jo pak kualifikimin e tyre për në fazën tjetër.
Liverpool kryeson këtë grup me 6 pikë të plota i ndjekur nga Atalanta e vendit të dytë me 4 pikë. Dy skuadrat do të përballen këtë javë në Itali me njera-tjetrën.
Pa.Va/Fjala.al
