Mediat ndërkombëtare raportojnë se nga sulmi i cilësuar si terrorist në Vjenë dyshohet të kenë ndërruar jetë 7 persona, mes tyre një zyrtar Policie.
“Ka pasur të shtëna me armë zjarri në qendër – ka persona të plagosur – rrini larg vendeve publike dhe transportit publik”, ka thënë policia.
Ministri i Brendshëm, Karl Nehammer, ka thënë se sulmi i së hënës besohet se është terrorist.
“Në këtë moment mund të konfirmoj se besojmë që duket se kemi një sulm terrorist”, ka thënë ai.
Policia e Vjenës u ka bërë thirrje njerëzve që të mos shpërndajnë video dhe fotografi nëpër rrjetet sociale.
“Kjo gjë rrezikon forcat policore si dhe popullsinë civile”, ka thënë ajo përmes një postimi në Twitter.
Oskar Deutsch, i cili është në krye në komunitetit të hebrenjve në Vjenë, ka thënë se të shtënat kanë ndodhur në rrugën ku gjendet sinagoga kryesore e qytetit, mirëpo ende nuk është e qartë nëse ky institucion ka qenë shënjestër.
Ndërkohë, mediat e huaja raportojnë se një prej autorëve të ngjarjes ka mbetur i vrarë nga Policia ndërsa tjetri është arratisur.
Pa.Va/Fjala.al
