Presidenti i Kosovës Hashim Thaçi tha se dialogu me Serbinë nuk ka kuptim nëse nuk diskutohet njohja reciproke. Bisedimet për këtë temë sipas tij i shërbejnë veçse Beogradit.
“Ky dialog ka vetëm një kuptim, nëse propozimi për njohje reciproke hidhet në tavolinë. Përndryshe është krejt i pakuptimtë, krejt i panevojshëm dhe është i dështuar dhe është në favor të Serbisë, si i tillë që po zhvillohet”, tha Thaçi.
Komente të ngjashme ka bërë të shtunën edhe kreu i Lidhjes Demokratike të Kosovës, Isa Mustafa, i cili u shpreh se dialogu po e humb kuptimin.
Mustafa shtoi se procesi i dialogut po “shndërrohet në instrument të Serbisë për të blerë kohë, për t’i harruar krimet”.
Qeveria e Kosovës e drejtuar nga Avdullah Hoti, insiston se Kosova bisedon me Serbinë për një marrëveshje finale, e cila do të përfshinte njohjen reciproke.
Së fundmi, me angazhimin e Shteteve të Bashkuara është arritur normalizimi i marrëdhënieve mes Prishtinës dhe Beogradit, ku më 4 shtator, u nënshkrua në Shtëpinë e Bardhë marrëveshja për normalizimin e marrëdhënieve ekonomike./Re.D/Fjala.al
