Kategoria e Parë e Kampionatit Kombëtar të Futbollit ka ngritur të mërkurën siparin me takimet e para të sezonit të ri, sezon ky që do të vijë i gjithi drejtpërdrejt në Rrjetin e Radio-Televizionit Shqiptar.
Dhe transmetuesi publik ka sjellë në kanalin RTSH Sport përballjen më të spikatur të javës, atë që u zhvillua në Stadiumin “Tofik Jashari” të Shijakut midis Erzenit vendas dhe Dinamos.
Pjesa e parë e kësaj ndeshjeje ka qenë e luftuar, por është mbyllur sidoqoftë me rrjeta të paprekura. Por me fillimin e pjesës së dytë, është Dinamo që do të kalojë e para në epërsi, kur Da Silva do të përshëndesë rrjetën e portës vendase në minutën e 50-të.
Erzeni do të mundohet të reagojë, duke krijuar një vëllim më të madh loje dhe duke u përpjekur, por pa rezultat, ta godasë portën e Dinamos, e cila, nga ana e saj do të tregohet cinike dhe do të gjejë edhe një gol të dytë, 5 minuta para fundit të kohës së rregullt, me anë të Pontrelit.
Pa.Va/Fjala.al
