Presidenti Ilir Meta reagon për ndarjen nga jeta të aktorit të njohur të humorit Koço Devole, duke theksuar se arti shqiptar humbi një prej kolosëve dhe figurave të dashura.
Sipas tij, aktori i njohur i humorit do t’u mungojë të shqiptarëve, ndërsa do të kujtohet gjithmonë duke qeshur.
“Sa shumë trishtim nga ky lajm! Sikur të na thoje se bëre shaka, nga ato të kripurat, që ti na bëje gjithmonë!
Humori dhe arti shqiptar padyshim humbën një prej kolosëve dhe figurave më të dashura, i cili do të na mungojë të gjithëve.
Familjes Devole, të afërmve dhe gjithë artistëve ju shpreh ngushëllimet më të ndjera! Do të kujtojmë gjithmonë duke qeshur i dashur Koço!”, shkruan Meta.
Aktori Devole u nda sot nga jeta në moshën 75-vjeçare, pasi humbi betejën me koronavirusin. Prej disa ditësh ai ishte i intubuar dhe në gjendje të rënduar në Spitalin e Infektivit.
Koço Devole ka lindur në Kuçovë më 28 nëntor 1945. Ai njihet si një nga personalitet më të njohura të humorit shqiptar.
Përveçse aktor i shkëlqyer humori, Devole është karikaturist, skenarist, regjisor dhe prezantues spektaklesh. Rolet e tij në skenë dhe ekran janë nga më të njohurit për publikun shqiptar./Bl.Ba/Fjala.al
