Me fitoren e zgjedhjeve presidenciale, Biden nuk është vonuar të shpalosë planin e tij për një nga çështjet më delikate në SHBA që ka ndikuar pjesërisht dhe në rezultatin zgjedhor, pandemia e koronavirusit.
Gjatë një fjalimi ai u zotua se trajtimi i Covid-19 do të jetë përparësia aktuale e ekipit te tij.
Ditë e hënë Biden përcaktoi planet për bordin e tij këshillues Transition Covid-19. Në emërimet e tij të para, ai përmendi tre bashkëkryetarë dhe 10 anëtarë.
Ndër bashkëkryetarët është Vivek Murthy, kirurg i përgjithshëm i emëruar nga presidenti Barack Obama në 2014 dhe i larguar nga presidenti Trump në 2017.
Anëtar tjetër është imunologu Rick Bright, i larguar nga administrata e Trump pas paralajmërimeve të tij të hershme mbi Covid-19.
Në deklaratë Biden tha se bordi do të ndihmojë për të marrë nën kontroll virusin, për të ofruar lehtësim për familjet që punojnë, për të adresuar pabarazitë raciale dhe për të rihapur shkollat dhe bizneset.
Fokusi i politikës së tij do të jetë veshja e maskave, distancimi social, gjurmimi i kontakteve dhe larja e duarve.
Ai gjithashtu tha se kjo sipërmarrje do t’iu japë fuqi zërat e shkencëtarëve dhe ekspertëve të shëndetit publik.
Komentet e presidentit Trump për Covid-19 shpesh janë në kundërshtim me shkencëtarët, përfshirë ekspertin kryesor të sëmundjeve infektive Anthony Fauci.
Biden të hënën mirëpriti gjithashtu lajmin nga Pfizer dhe BioNTech se vaksina e tyre në zhvillim mund të parandalojë më shumë se 90% të njerëzve të infektohen me Covid-19. /Re.D/Fjala.al
