Policia e Elbasanit jep njoftim zyrtar për arrestimin e 28-vjeçarit Klajdi Dekoli, mik i afërt i fisit Çapja, si bashkëpunëtor në vrasjen e babë e bir, Nezir dhe Gentian Beqiri, në banesën e tyre.
Në drejtimin e Prokurorisë pranë Gjykatës së Shkallës së Parë Elbasan, pas një pune të mirëfilltë hetimore nga Seksioni për Hetimin e Krimeve të Rënda në Drejtorinë Vendore të Policisë Elbasan, në koordinim nga Departamenti i Policisë Kriminale në DPPSH, në kuadër të procedimit penal në lidhje me ngjarjen e ndodhur më datë 15.08.2012, në Elbasan, është bërë kapja dhe ndalimi i shtetasit:
Klajdi Dekoli, 28 vjeç, banues në Elbasan, të cilit Gjykata e Shkallës së Parë Elbasan i ka vendosur masën e sigurisë “Arrest në burg”, për veprën penale “Vrasja në rrethana të tjera cilësuese” e kryer në bashkëpunim”, pasi ky shtetas dyshohet se në bashkëpunim me shtetasin J. L. ( i cili është arrestuar me parë), më datë 15.08.2012, kanë vrarë me armë zjarri shtetasit Gentian Beqiri dhe Nezir Beqiri (babë e bir), në banesë.
28-vjeçari Klajdi Dukoli akuzohet si një ndër autorët e përfshirë në vrasjen e Gentian dhe Nezir Beqiri babë e bir të ekzekutuar në shtëpinë e tyre në 15 gusht 2012.
Në drejtimin e Prokurorisë së Rrethit Elbasan vijon puna intensive për identifikimin e personave të tjerë të implikuar në këtë ngjarje.
Materialet hetimore i kaluan Prokurorisë pranë Gjykatës së Shkallës Parë Elbasan, për veprimet e mëtejshme procedurale./Bl.Ba/Fjala.al
