Pasi kryeministri Edi Rama ka publikuar një video ku tregonte pamjet e COVID 2 me shtretër të lirë, ka reaguar menjëherë kreu demokrat Lulzim Basha i cili vijon të akuzojë se kryeministri ka humbur kontrollin mbi pandeminë.
“Ja çfarë thonë familjarët e të sëmurëve. Faktet flasin vetë dhe tregojnë të vërtetën ashtu siç është. Pasi shkatërroi ekonominë, Rama e humbi kontrollin ndaj pandemisë dhe po shkatërron jetët dhe shëndetin e familjeve shqiptare“, thotë Basha.
Kurse disa prej familjarëve të të sëmurëve me COVID në video thonë “Kam pritur në ambulancë gjysmë dite”. “Dua ta çoj jashtë”.
I menjëhershëm ka qenë dhe reagimi i Kryeministrit Rama në Twitter pasi kryedemokrati publikoi video të deklaratave të familjarëve të të sëmurëve me Covid që ankohen për kushtet dhe trajtimin në spital.
Sipas Ramës, opozita, për të cilën thotë se nuk bashkohet as në kohën e një sëmundje që bie njëherë në shekull, nuk i duhet as dreqit.
“Një opozitë që as në një sëmundje që bie një herë në shekull nuk gjen dot forcë të bëhet bashkë me shumicën nuk i duhet as dreqit e jo më popullit shqiptar!”, shkruan Rama./Bl.Ba/Fjala.al
