Nga mbi 5000 punonjës policorë dhe civilë të stafit të burgjeve në të gjithë Shqipërinë, aktualisht rezultojnë 36 punonjës pozitiv dhe 85 janë në karantinë, të dyshuar si të infektuar.
Katër prej të infektuarve janë në pozicione drejtuese.
Nga 5000 të dënuar dhe të paraburgosur vetëm gjashtë prej tyre kanë shfaqur simptoma të lehta të COVID-19 dhe janë karantinuar në mjediset e Institucionit të Ekzekutimit të Vendimeve Penale (IEVP) Shënkoll, që është dhe burgu i përcaktuar për izolimin e rasteve me koronavirus.
Të gjashtë të burgosurit vijnë nga IEVP-ja e Tepelenës.
Në Qendrën Spitalore të Burgjeve, ku trajtohen të dënuarit e dyshuar me COVID-19, nuk ka asnjë të shtruar me koronavirus.
Para katër ditësh vetë Ministrja e Drejtësisë ka inspektuar IEVP-në e Shënkollit për të verifikuar personalisht situatën e respektimit të masave të sigurisë dhe atyre anti-COVID.
Gjatë valës së parë të pandemisë, godinat e reja 4 dhe 5 të këtij institucioni shërbyen si vend pritës i të dënuarve me problematika të lehta të COVID.
Hapësirat dhe kapacitetet pritëse të godinave në IEVP Shënkoll, infermieria dhe baza mjekësore nëse do të jetë e nevojshme, janë të gatshme për t’u përshtatur me struktura speciale për trajtimin e të dënuarve me shenja të lehta të infeksionit./Re.D/Fjala.al
