Frika për përhapjen e koronavirusit në çdo ambient apo sallë të mbyllur, ka përfshirë edhe Parlamentin e Shqipërisë.
Kështu, kryetari i Kuvendit, Gramoz Ruçi, ka vendosur që të anulojë seancën plenare të radhës, e planifikuar për ditën e enjte, nesër, datë 19 nëntor 2020.
Kuvendi ka zbatuar në këtë mënyrë vendimin e Komitetit Teknik të Ekspertëve si dhe urdhrin e Ministres së Shëndetësisë dhe Mbrojtjes Shoqërore “Për ndalimin e grumbullimeve në vende të mbyllura apo të hapura”.
Pavarësisht nga këto masa, kryeparlamentari Ruçi, i është drejtuar “Komitetit Teknik të Ekspertëve dhe Ministres së Shëndetësisë dhe Mbrojtjes Shoqërore, znj. Ogerta Manastirliu, për të bërë një interpretim lidhur me vazhdimin e seancave plenare të Kuvendit“, thuhet në njoftim.
Në të vërtetë, kanë qenë të shumta rastet e deputetëve të prekur nga koronavirusi në Parlamentin shqiptar që prej nisjes së pandemisë.
Më i fundit, është ai i Andi Përmetit të Bindjes Demokratike, i cili është dërguar me urgjencë në Turqi në gjendje të rëndë./Bl.Ba/Fjala.al
