Më në fund vjen një lajm i mirë për Thomas Strakoshën, i cili ka rreth një muaj që nuk luan një ndeshje zyrtare. Mësohet se portieri shqiptar i Lacios ka dalë negativ në testin e fundit për virusin korona.
Gardiani i portës së Kombëtares kuqezi ka humbur ndeshjet e fundit me klubin e tij, Lacion, si edhe takimet e Shqipërisë, të vlefshme për Ligën e Kombeve.
Por tanimë mësohet se Strakosha ka mposhtur virusin Covid-19 dhe pritet të vihet në dispozicion të trajnerit Simone Inzagi për ndeshjen e kësaj fundjave, në vizitën që do t’i bëjë skuadrës së ngjitur rishtazi në elitën e futbollit italian, Krotones.
Portieri 25-vjeçar shqiptar ka rreth një muaj që nuk luan dhe së fundi humbi edhe 3 ndeshjet e Kombëtares Shqiptare, dy në Ligën e Kombeve dhe miqësoren me Kosovën, pasi kishte rezultuar pozitiv për Covid-19.
Sidoqoftë, në tamponët e kryer dje nga klubi kryeqytetas, Strakosha rezultoi negativ, ashtu sikundër kishte rezultuar edhe më herët edhe sulmuesi i bardhekaltërve Çiro Imobile, dhe që të dy pritet të jenë në dispozicion të Inzagit për ndeshjen e të shtunës. “Covid-19” është i pranishëm prej javësh tek Lacio, por duket se kohët e fundit situata është përmirësuar.
