Është regjistruar sot në gjykatën e Tiranës, partia e Jozefina Topallit, “Lëvizja për Ndryshim”. Gjykata e Tiranës ka pranuar kërkesën për të regjistruar partinë politike të drejtuar nga Topalli.
Vendimi u shpall ditën e sotme, më datë 23.11.2020, në kryeqytet. Vendimi u nënshkrua nga sekretarja e gjykatës Lusjana Fezollari dhe gjyqtari Ervin Fezollari.
Mesa duket ish-kryeparalamentarja ia ka dalë të mbledh votat që duhen për të regjistruar partinë dhe tashmë ajo zyrtarizohet për të marrë pjesë në zgjedhjet e 25 prillit.
Gjatë prezantimit të Partisë së saj pak kohë më parë, Topalli u shpreh se nuk do të qëndrojë anash dhe të heshtë, por do të mbështesë projektin e brezit të ri për të shpëtuar Shqipërinë, që sipas saj është në dorën e tre njerëzve që e kanë çuar në buzë të greminës.
Kujtojmë se, pak kohë më parë edhe deputeti Myslim Murrizi ka krijuar dhe ka regjistruar në Gjykatë partinë me të cilën do të garojë në zgjedhje, Lëvizjen Demokratike Shqiptare.
Ndërkohë, pritet që më datë 28 Nëntor dhe deputetja Rudina Hajdari të prezantojë partinë me të cilën do të garojë në këto zgjedhje, një lëvizje e krijuar prej saj.
Të tre politikanët e mësipërm që në këto zgjedhje do të garojnë me partitë e tyre, kanë dalë nga lista e PD./Bl.Ba/Fjala.al
