Një person në Ohio la bakshish 3000 dollarë pasi konsumoi një birrë në restorantin që po mbyllej për shkak të koronavirusit.
“Personi në fjalë hyri në restorant të dielën, porositi birrën dhe më pas e kërkoi çekun i cili e kishte vlerën 7.02 dollarë”, shkroi në Facebook pronari i restorantit, Brendan Ring.
Ai shkroi se klienti i tij i uroi shëndet dhe i tha që bakshishin ta ndajë me katër punonjësit që ishin në ndërrimin e mëngjesit. Teksa burri largohej, Ring shikoi në faturë dhe e kuptoi se ishte fjala për 3000 dollarë.
“Unë vrapova pas tij dhe ai më tha që nuk ka asnjë gabim dhe se do të shihemi kur ta rihapim restorantin”.
Pronari i restorantit tha se ai dhe stafi i tij ishin ‘përulësisht mirënjohës për këtë gjest jashtëzakonisht të mirë dhe madhështor”.
