Media zviceriane ’20 minuten’ publikoi një video që është xhiruar gjatë sulmit terrorist të ndodhur në Vjenë. Në video shihet teksa terroristi, Kujtim Fejzulai, shkon në vendin ku kreu krimin dhe në sfond dëgjohet kënga e reperit shqiptar, Nushi, AK47.
Sipas medias zviceriane terroristi është inspiruar nga kjo këngë për të kryer aktin.
Menjëherë pas këtij lajmi ka reaguar reperi përmes një InstaStory duke thënë se muzika e tij nuk duhet të jetë inspirim i tillë.
“Çdo projekt i imi është i bazuar në realitet, e në ngjarje që fatkeqësisht ndodhin, e sidomos viteve të fundit që është shpeshtuar tej mase. Për mua ka qenë mjafte e dhimbshme ngjarja e fundit, shpresoj mos të ndodhin më kurrë. E, kjo e fundit nuk duhet të jetë asnjëherë inspiruese për të rinjtë sot, e aq më pak për të kryer sulme terroriste e duke vrarë njerëz të pafajshëm, e megjith këtë duke dëgjuar këngën time, jam i shokuar…
Duhet me qenë goxha psikopat që të inspirohesh në këngë e pastaj të kryesh sulme terroriste, kjo është absurde.
Pasi që ka javë që mediat evropiane po shkruajnë për këtë ngjarje mua me vjen vërtetë keq që jam përfshirë me këngën time në këtë tragjedi, madje që është cekur në mediat e huaj emri edhe kënga ime “AK-47”, e siç e cilësohet nga ta “këngë inspiruese”. Më vjen shumë keq për familjet e viktimave në Austri edhe i shprehi ngushëllime të sinqerta. Zoti qoftë me ju!” tha reperi./R.G/Fjala.al
